विचारको आधारमा बनेका मोर्चा बन्दी लामो समय टिक्दैनन् : एमएस थापा मगर, अध्यक्ष राष्ट्रिय जनमुक्ति पार्टी

अरु राजनीतिक दलहरुले झै तपाईहरु पनि मोर्चा बन्दीमा लाग्नु भएको हो ?
हामी मोर्चा बन्दीमा सहभागी छैनौ । केही सञ्चार माध्यमबाट हाम्रो पार्टीलाई पनि १५ असोजमा घोषणा भएको उपेन्द्र यादवको नेतृत्वको मोर्चामा सहभागी भएको प्रचार गरियो त्यो सत्य होइन । हामी त्यस मोर्चामा सहभागी नरहेको स्पष्ट गर्न चाहन्छौ । त्यस मोर्चामा हामीसंग छुटिएको अर्को नयाँ जनमुक्ति पार्टी सामेल भएको हो ।

मोर्चा बनाउने राजनीतिक दलहरुको कामलाई कसरी हेर्नु भएको छ ?
आ –आफ्नो विचार समूहका मोर्चा बनाउने काम प्रति हाम्रो सहानुभूति रहे पनि हामी त्यो दिशामा लागेका छैनौ ।
तपाईहरु त्यस्ता मोर्चामा सहभागी हुने वा अलग मोर्चा बनाउने रणनीतिमा हुनु हुन्न ?
अहिले तत्काल त्यस्तो योजना बनाइसकेका छैनौ ।
एउटा मुद्धामा सहमति जुटाएर बन्ने गरेको मोर्चावन्दी भोलिका दिनमा कति दिगो रहँला ?
अहिले बनेका मोर्चावन्दी एउटै विचार समूहहरुको मोर्चा बन्दी हो । भोली गएर पार्टी एकिकरण गर्ने योजना अनुरुप अहिलेको मोर्चा बनेको जस्तो मलाई लाग्छ । साझा मुद्धा भन्दा बैचारिक आधारमा मोर्चा बनिरहेको छ । त्यसरी बन्ने मोर्चा दिगो नहुन पनि सक्छ ।
अहिले बन्ने गरेको मोर्चा आउने निर्वाचनको समिकरणको लागि पनि हो भनिन्छ नि ?
अहिलेको स्थिति हेर्दा निर्वाचन हुने अवस्था नै देखिन्न । तीन ̸ चार दलहरु आआफै कलहमा फसिरहेका छन् । अहिलेको मोर्चा निर्वाचनका लागि भनेर बनाएका जस्तो देखिन्न ।
जनमुक्ति पार्टीले अगामी निर्वाचनका लागि त्यस्तै मोर्चा बनाएर अगाडि बढ्ने सोचाइ बनाइरहेको छ कि ?
अहिले त्यो विषयमा सोचेका छैनौ । निर्वाचन धेरै टाढाको विषय हो ।
जनमुक्ति पार्टीले सबैलाई गोलबन्द गरेर पार्टीमा ल्याउने जमर्को पनि गरेको थियो त्यो कुरा कता सेलायो ?
जनजातिलाई मात्र होइन कि संघीयतावादीको एउटै पार्टी बनाउने भनेर जनमुक्ति पार्टी कसिएर लागेको थियो । फरक– फरक विचार समूह भएका पार्टी भएकाले सहमति नभए पछि त्यो काम अहिले त्यसै रोकिएको छ ।
केही दिन पछि नयाँ पार्टी पनि आउने वाला छ । विचार उस्तै भएकोले त्यसैमा जनमुक्ति पार्टी पनि विलय हुन्छ कि ?
हामी आफ्नो पार्टी छोडेर अरुको पार्टीमा जाने छैनौ ।
(राज्यसत्ता नेपाल व्युरो )